Almennar fréttir - 05.01.2022

Átt þú erindi í stjórn Lífeyrissjóðs verzlunarmanna?

VR auglýsir eftir stjórnarfólki í stjórn Lífeyrissjóðs verzlunarmanna kjörtímabilið 2022 - 2026. Fulltrúaráð VR í Lífeyrissjóði verzlunarmanna skipar í stjórn lífeyrissjóðsins. Áhugasöm geta gefið kost á sér með því að senda inn kynningarbréf með rökstuðningi, starfsferilsskrá og yfirlýsingu sem finna má á www.vr.is/live, fyrir kl. 12:00 á hádegi föstudaginn 21. janúar. Gögn skulu berast á umsokn@vr.is eða á skrifstofu VR merkt „Umsókn LIVE“. Valið verður í tvö stjórnarsæti og eitt til vara.

Þau sem gefa kost á sér skulu:

• Vera launafólk sem greiðir skyldubundið lífeyrisiðgjald til Lífeyrissjóðs verzlunarmanna, æskilegt er að þau séu félagsfólk í VR.
• Ekki vera sjálfstætt starfandi atvinnurekendur/einyrkjar.
• Búa yfir nægilegri þekkingu og starfsreynslu til að geta gegnt stjórnarstörfum á tilhlýðilegan hátt skv. 6. gr. reglna FME nr. 180/2013.
• Uppfylla skilyrði 31. gr. laga nr. 129/1997 um starfsemi lífeyrissjóða um fjárhagslegt sjálfstæði, óflekkað mannorð o.fl. Auk þess þurfa þau að gangast undir munnlegt hæfismat hjá FME sbr. 16 gr. reglna FME
  nr. 180/2013.

Við mat á hæfi umsækjenda verður litið til reynslu og þekkingar, m.a. á lífeyrismálum, kjarasamningum, stjórnun, áætlanagerð, lögfræði og fjármálamörkuðum.

Nánari upplýsingar og yfirlýsing sem þarf að skila með umsókn eru á www.vr.is/live